О проєкті ЛeмСловo

Буква по букві слово творят, слова в речыня ся міняют.
Кажда буква – дыханя языка, кажде слово – памят народу.

Дорогы приятелі, знаємы, Лемкы і Лемкыні, любителі лемківского языка і лемківской культуры! З великом радістю представлям Вам першый інтернетовый спис польско-лемківского і лемківско-польского словництва – ЛeмСловo.

Єст то вынятковый проєкт, што возник цілком незалежно, без підпоры державных інституций, позаурядовых орґанізаций ци зовнішнього фінансуваня. Зродил ся з пасиі, потребы серця і внутрішнього переконаня, же мусиме вратувати од забытя тото, што для нас Лемків найціннійше – язык, якій єст дыхом і душом нашого народу.

Язык то не лем нарядя комунікациі. То памят, традиция, істория і достоменніст. Як дозволиме му замолкнути, зникне разом з ним част нашой культуры, спадковины і меджепоколіньовых звязків.

ЛемСлово возникло, жебы зміцняти языкову свідоміст, заохочати до вчыня і штоденного хоснуваня лемківского языка, а тіж жебы злегшыти дальшым поколіням доступ до того безцінного скарбу.

Чом «спис», а не «словник»?

Традицийный словник асоциює ся з науковыма рамами, принципами встановленыма языковыма орґанами і вызнаныма авторитетныма інституциями. Мій проєкт не має такых рам – не єст академіцкым правописом, але місцьом громаджыня і зберіганя жывого языка в цілым його богатстві, ріжнорідности і істориі, зато цільово назвал єм го «списом».

В списі найдете слова записаны в ріжных формах:

• формы вызнаны Радом Лемківского Языка і авторитетныма інституциями,
• слова, котры іщы недавно были пошырены, а днес принимат ся іх за неправильны,
• стары слова, днес рідко хоснуваны, а часом являют ся уж архаічныма,
• забыты слова або втрачены в результаті полонізациі,
• неолоґізмы, котры входят до языка.

Завдякы тому проєктови ЛeмСловo єст не лем едукацийным нарядьом, але і свідоцтвом еволюциі языка, місцьом для рефлексиі над тым, як наша бесіда змінят ся протягом років.

Хоснуйте ЛемСлово мудро, критично і творчо.

Інспірациі і ґенеза

Думка зродила ся з фасцинациі істнуючыма паперьовыма словниками, інтернетовыма публикациями з шыроко узнаных лемківскых порталів, а тіж часописами і лемківскыма книжками.

Інтернетовый характер проєкту дає новы можливости – завдякы засягови сіти інтернет доступ до спису має каждый, незалежно од місця прожываня.

Моя роля

Не єм языкознавцьом ни філолоґом. Єм технічном особом. Мойом рольом было створити інтернетову аплікацию, яка дає можливіст громаджыня базы слів і іх выгідне гляданя в обох напрямах.

Сердечно прошу вшыткых хоснувателів спілтворити проєкт: тестувати, зголошувати увагы і пропонувати новы тлумачыня.

Подякуваня

З цілого серця дякую вшыткым, котры створили основу того проєкту.

• пана Ярослава Горощака,
• пані проф. Олены Дуць-Файфер,
• редакторів ґазеты Бесіда,
• редакциі Радия і Порталю lem.fm,
• ансамблю Radio-Lemko.pl.

Для кого і в якій ціли?

• едукациі і вчыня языка,
• плеканя достоменности,
• будуваня звязків з культуром і традицийом,
• розвиваня языковой свідомости.

Актуальный стан і розвитик проєкту

Проєкт єст фурт активно розвиваный. На днес слів в базі єст коло 80 000. Інформациі о актуализациях публикую на сайті проєкту і в социяльных медиях.

Формуляр пропозициі слів: https://lemslowo.org/proponuju/

Полна база доступна єст гев: https://lemslowo.org

Як можеш помочы?

• пропонуючы новы тлумачыня,
• зголошуючы хыбы і неточности,
• удоступняючы проєкт серед знаємых,
• беручы над ним патронат,
• підпорюючы фінансово: https://lemslowo.org/datok

Наша спільна місия

Най тот спис стане ся нашым спільным місцьом памяти і інспіраций. Дільте ся ним, хоснуйте і допомагайте го розвивати – для нас і для будучых поколінь.

#лем #спис #буква #слово #речыня #спадковина #язык #памят
#lem #spis #litera #słowo #zdanie #dziedzictwo #język #pamięć

Першый інтернетовый спис лемківского словництва

🔗 https://lemslowo.org